vajd-e-ahl-e-kamal hai kuchh aur
shaiḳh-sahib ka haal hai kuchh aur
hosh jaata hai ahl-e-hosh ka sun
tere maston ka haal hai kuchh aur
faḳhr-e-insan nahin malak hona
ji men apne ḳhayal hai kuchh aur
jis ko kahte hain vasl vasl nahin
ma.ani-e-ittisal hai kuchh aur
ghair-e-harf-e-niyaz so bhi kabhu
kah sakun huun majal hai kuchh aur
ruḳh-e-ḳhurshid par kahan vo nuur
mere mah ka jamal hai kuchh aur
sarv! da.ava-e-ham-sari mat kar
vo qad-e-naunihal hai kuchh aur
kabk tu ḳhush-ḳhiram hai lekin
yaar ki mere chaal hai kuchh aur
dekh chal tu bhi halat-e-‘bedar’
aaj us ka to haal hai kuchh aur
Leave a Reply