Osama Khalid
kis ka aks numayan hoga aise gadle paani men
suraj Duub gaya hai mere angan ki virani men
is ghar ki divar men jaane kis ke kaan phanse honge
sirf yahi Dar lahiq hai mujh ko har naql-e-makani men
hijr ki shab raushan tha ghar men ek sitara aur charagh
aankh jhapakne tak ka vaqt nahin tha is hairani men
mujh se pahle bhi kuchh vahshi is uljhan men faut hue
aḳhir kis ka dast-e-junun hai vahshat ki asani men
surḳh andhera chhaTne ki minnat ka phika zard charagh
chhoḌ diya hai saanp kisi ne jhiil ke saada paani men
jaise kisi ne bachchon vaale ghar men saanp ko rakhna ho
aise mujhe Dar lagta hai is hijran ki nigarani men
Leave a Reply