sochta huun ki bahut sada-o-masum hai vo
main abhi us ko shanasa-e-mohabbat na karun
ruuh ko us ki asir-e-gham-e-ulfat na karun
us ko rusva na karun vaqf-e-musibat na karun
sochta huun ki abhi ranj se azad hai vo
vaqif-e-dard nahin khugar-e-alam nahin
sahar-e-aish men us ki asar-e-sham nahin
zindagi us ke liye zahr bhara jaam nahin
sochta huun ki mohabbat hai javani ki khizan
us ne dekha nahin duniya men baharon ke siva
nikhat-o-nur se labrez nazaron ke siva
sabza-zaron ke siva aur sitaron ke siva
sochta huun ki gham-e-dil na sunaun us ko
samne us ke kabhi raaz ko uryan na karun
khalish-e-dil se use dast-o-gareban na karun
us ke jazbat ko main shoala-ba-daman na karun
sochta huun ki jala degi mohabbat us ko
vo mohabbat ki bhala taab kahan laegi
khud to vo atish-e-jazbat men jal jaegi
aur duniya ko is anjam pe tadpaegi
sochta huun ki bahut sada-o-masum hai vo
main use vaqif-e-ulfat na karun
Leave a Reply