faza men naghma-e-avaz-e-pa hai mere liye
karan se ta-ba-karan ik nida hai mere liye
main apni zaat men lauTa to phir mila na mujhe
vo ek shaḳhs jo rota raha hai mere liye
sabab hai ranj ka kuchh ḳhu-e-iztirab miri
kuchh apne aap se bhi vo ḳhafa hai mere liye
falak tamam hai aghosh-e-bab-e-mahrumi
shajar shajar yahan dast-e-dua hai mere liye
kisi firaq ki tamhid ban ke rah jaana
tire visal ki taskin bhi kya hai mere liye
Leave a Reply