maktab men tujhe dekh kise hosh-e-sabaq hai
har tifl ke yaan ashk se aluda varaq hai
huun muntazir us mahr ke aane hi ka varna
shabnam ki tarah ankhon men dam koi ramaq hai
dekh ai chaman-e-husn tujhe baagh men ḳhandan
shabnam nahin ye gul pe ḳhajalat se araq hai
vo chand sa munh surḳh dupaTTa men hai raḳhshan
ya mahr kahun jalva-numa zer-e-shafaq hai
nargis ki zar-o-gul pe bhi va chashm-e-tama hai
is par ki zar-o-sim ka us paas tabaq hai
dil us but-e-be-mehr ko de muft hi khoya
kahte hain jo kuchh yaar mujhe vaqa.i haq hai
juz tere nahin ghair ko rah dil ke nagar men
jab se ki tire ishq ka yaan nazm-o-nasaq hai
mazkur hua yaan magar us gul ke dahan ka
jo rashk se har ghuncha ka dil baagh men shaq hai
kar masqala-e-zikr se dil saaf tu apna
‘bedar’ ye a.ina tajalli-gah-e-haq hai
Leave a Reply