socho to qayamat hai chhalava hai bala hai
dekho to faqat raah men naqsh-e-kaf-e-pa hai
maana ki tire haq se tujhe kam hi mila hai
ye bhi kabhi socha hai ki kya tu ne diya hai
main qafila-e-vaqt ke hamrah chalun kya
jo shaḳhs hai pichhe ki taraf dekh raha hai
auron ke taqabul men sada past raha huun
ye bhi miri na-karda-gunahi ki saza hai
ab apne hi maazi pe yaqin aa nahin paata
lagta hai ye qissa bhi kabhi main ne suna hai
duniya ko jo chhoḌa tha to kuchh aur tha aalam
duniya ko jo chaha to ajab haal hua hai
is daur ko kya sa.i-e-hidayat ki zarurat
jis daur ka jo shaḳhs hai farzana bana hai
ye bhi miri qismat ki ulajh baiTha main in men
kuchh aise amal jin ki saza hai na jaza hai
us gham ko bhala kyon na main siine se laga.un
vo gham jo mire dost tira husn-e-ata hai
mumkin ho to mil jaao kisi haal men ik baar
ab vaqt ka suraj hai ki jo Duub raha hai
‘qadir’ ko shikayat nahin ghairon ki ravish se
‘qadir’ ko to apnon hi ne mayus kiya hai
Leave a Reply