Aslam Noor Aslam
karb-e-juda.i ankhon men aane nahin diya
be-kar ansuon ko bhi jaane nahin diya
main ne nikal ke ḳhud se banaya tujhe ḳhuda
tu ne aqidaton ko nibhane nahin diya
kuchh daan maang leta magar raat dil ne bhi
soi hui pari ko jagane nahin diya
hoti qubul us ke siva kis ki rahbari
dil ne hi inqilab uThane nahin diya
ankhen thi meri kitni rifaqat ki muntazir
main ne unhen ye ḳhvab sajane nahin diya
ik rasm hai vafa ke liye be-vafa.en bhi
kya zulm hai ki us ko nibhane nahin diya
sach hai use ḳhayal miri ḳhvahishon ka tha
main ne hi zer-e-lab unhen aane nahin diya
ik falsafa usi ki haqiqat se maang kar
sar ko dar-e-butan pe jhukane nahin diya
Leave a Reply