Poet
sar kabhi gardan kabhi ruḳhsar sahlata raha
ek hi jhonka palaT kar baar baar aata raha
phuul par baiThi hui titli achanak uḌ ga.i
ye ḳhazana aḳhir apne haath se jaata raha
sham.a ki lau par hava ne honT apne rakh diye
vajd men aa kar dhuan ta-der lahrata raha
is tamanna men ki ahl-e-dil mujhe tujh sa kahen
tera ik ik rang ik ik Dhang apnata raha
yuun ki dohri zindagi jiine ki aadat thi mujhe
ḳhud ko siine se lagata aur Thukrata raha
dar dariche band aur ankhen khuli rakhte hue
main bhare ghar men gum apne aap ko paata raha
Leave a Reply