tumhara adl-e-jahangir aur hi kuchh hai
miri ḳhata miri taqsir aur hi kuchh hai
bayan-e-va.iz-e-rangin-nava hai ḳhuub magar
hamare shahr ki tasvir aur hi kuchh hai
kitab men jo likha hai durust hai lekin
hamare ḳhvab ki ta.abir aur hi kuchh hai
hasin-tar hai farogh-e-nazar hai husn-e-jahan
tumhara husn-e-hama-gir aur hi kuchh hai
suḳhan-varon ne izafe kiye ghazal men bahut
maqam-e-mir-taqi-‘mir’ aur hi kuchh hai
Leave a Reply