phir tire reshmi lab mujh ko manane aae
pyaas janmon ki phir ik baar bujhane aae
yaad se us ki kaho aaj satane aae
khvab ankhon se, sakun dil se churane aae
aaj phir dard ke bazar saje hain yaaro
ashk phir ankhon men dukan lagane aae
tu ne ehsas ki daulat se navaza tha magar
ziist ke fikr-o-alam hosh udane aae
muntazir aaj talak bhi hain ki is raat kabhi
tu kisi aur se milne ke bahane aae
kam-sini mujh men yahi soch ke zinda hai ‘sahar’
main jo ruthun to kabhi tu bhi manane aae
Leave a Reply