Allama Iqbal
aql go astan se duur nahin
us ki taqdir men huzur nahin
dil-e-bina bhi kar khuda se talab
aankh ka nuur dil ka nuur nahin
ilm men bhi surur hai lekin
ye vo jannat hai jis men huur nahin
kya ghazab hai ki is zamane men
ek bhi sahib-e-surur nahin
ik junun hai ki ba-shuur bhi hai
ik junun hai ki ba-shuur nahin
na-suburi hai zindagi dil ki
aah vo dil ki na-subur nahin
be-huzuri hai teri maut ka raaz
zinda ho tu to be-huzur nahin
har guhar ne sadaf ko tod diya
tu hi amada-e-zuhur nahin
areni main bhi kah raha huun magar
ye hadis-e-kalim-o-tur nahin
Leave a Reply