taalluq apni jagah tujh se barqarar bhi hai
magar ye kya ki tire qurb se farar bhi hai
kured aur zamin mausamon ke mutalashi!
yahin kahin miri khoi hui bahar bhi hai
yahi na ho tiri manzil zara thahar ai dil
vahi makan hai diyon ki vahi qatar bhi hai
yunhi to ruuh nahin todti hisar-e-badan
zarur apna koi badalon ke paar bhi hai
main pattharon se hi sar ko patakh ke laut aaya
chatan kahti rahi mujh men shahkar bhi hai
ye kya ki rok ke baitha hua huun sail-e-havas
machan par bhi huun aur samne shikar bhi hai
chhupa hua bhi huun jiine ki aarzu le ke
panah-gah miri sher ki kachhar bhi hai
Leave a Reply