ye to sahra hai yahan ThanDi hava kab aa.egi
yaar, tum ko saans lene ki ada kab aa.egi
kuuch karna chahte hain phir miri basti ke log
phir tiri avaz ai koh-e-nida kab aa.egi
nasl-e-taza, main tujhe kya tajrabe apne bata.un
tere baḌhte jism par meri qaba kab aa.egi
sar-barahna bibiyon ke baal chandi ho ga.e
ḳheme phir istada kab honge rida kab aa.egi
taaq men kab tak jalega ye charagh-e-intizar
is taraf shab-e-gasht logon ki sada kab aa.egi
meri miTTi men bhi kuchh paude numu-amada hain
tu mire angan tak ai kaali ghaTa kab aa.egi
Leave a Reply