Sahar Ansari
haath aa saka hai silsila-e-jism-o-jan kahan
apni talab men ghuum chuka huun kahan kahan
jis bazm men gaya talab-e-sar-ḳhushi liye
mujh se tire ḳhayal ne puchha yahan kahan
main aaj bhi ḳhala men huun kal bhi ḳhala men tha
mere liye zamin kahan asman kahan
tu hai so apne husn ke ba-vasf gham-nasib
main huun to mere haath men kaun-o-makan kahan
hoti hai ek dushmani o dosti ki had
is had ke ba.ad zahmat-e-lafz-o-bayan kahan
rah-e-junun men tesha-ba-dast aa gaya huun main
har sang hai giran magar itna giran kahan
ab chhoḌiye tasavvur-e-zulf-o-mizha ‘sahar’
dasht-e-gham-e-jahan men koi sa.eban kahan
Leave a Reply