Wo Kisi Se Tumko Jo Rabt Tha Tumhein Yaad Ho Ki Na Yaad Ho

Poet

vo kisi se tum ko jo rabt tha tumhen yaad ho ki na yaad ho

vo kisi pe tha koi mubtila tumhen yaad ho ki na yaad ho

kabhi ham men tum men bhi pyaar tha tumhen yaad ho ki na yaad ho

kabhi ham bhi tum bhi the ek-ja tumhen yaad ho ki na yaad ho

vo banana chehra itaab ka vo na dena munh se javab ka

vo kisi ki minnat o iltija tumhen yaad ho ki na yaad ho

tumhen jis ki chaah pe naaz tha jo tumhara mahram-e-raz tha

main vahi huun ashiq-e-ba-vafa tumhen yaad ho ki na yaad ho

kabhi ham men tum men bhi saaz the kabhi ham bhi vaqf-e-niyaz the

hamen yaad tha so jata diya tumhen yaad ho ki na yaad ho

kabhi bolna vo khafa khafa kabhi baithna vo juda juda

vo zamana naaz o niyaz ka tumhen yaad ho ki na yaad ho

abhi thode din ka hai tazkira ki raqib kahte the barmala

mire aage tum ko bura-bhala tumhen yaad ho ki na yaad ho

kabhi hans ke munh ko chhupa liya kabhi muskura ke dikha diya

kabhi shokhiyan thiin kabhi haya tumhen yaad ho ki na yaad ho

jo bana hai arif-e-ba-khuda ye vahi ‘zahir’ hai be-haya

vo jo rind-e-khana-badosh tha tumhen yaad ho ki na yaad ho