vafa ki fasl phir bone chali huun
main kya paungi bas khone chali huun
junun ki had se bhi aage qadam hai
na jaane aur kya hone chali huun
ye mumkin to nazar aata nahin hai
ana ko apni main dhone chali huun
samundar aa gaya mere muqabil
jab us ne dekha main rone chali huun
yahi neki mujhe zinda rakhegi
ki bojh auron ka main dhone chali huun
rahi huun muztarib khud ko bhi pa kar
phir apne aap ko khone chali huun
utar aai hai yaad ankhon men teri
main tere vaste sone chali huun
bahut hai barish-e-alam ‘rumi’
hifazat ko kisi kone chali huun
Leave a Reply