adab men muddai-e-fan to be-shumar mile
magar na ‘mir’ ke ‘ghalib’ ke virsa-dar mile
junun-e-ishq ko daman to taar taar mila
maza to jab hai gareban bhi taar taar mile
bade maze se guzari hai zindagi main ne
khuda ke fazl se halat sazgar mile
kisi ke dil pe bhala ikhtiyar kya hoga
bahut hai apne hi dil par jo ikhtiyar mile
ye kya sitam hai ki aada to paaen hur-o-qusur
jo un ke chahne vaale hain un ko daar mile
mire mizaj ko bakhsha hai inkisar agar
ba-qadr-e-zarf tabiat ko inkisar mile
har ik amal pe mukallaf bana ke farmaya
kahin se dekhna daman na dagh-dar mile
mira mazaq hai ikram-e-dostan ‘vasfi’
vo dil hi paas nahin jis men kuchh ghubar mile
Leave a Reply