tez andhi raat andhyari akela rah-rau
baḌh raha hai sochta Darta jhijakta rah-rau
manzilen samten badalti ja rahi hain roz o shab
is bhari duniya men hai insan tanha rah-rau
kuchh to hai jo shahr men phirta hai ghabrata hua
be-ḳhabar varna bhare jangal se guzra rah-rau
khiḌkiyan khulne lagin darvaze va hone lage
jab bhi guzra raah se koi sajila rah-rau
ḳhizr ki si umr varna kaise tanha kaTte
be-sahara raston ka hain sahara rah-rau
baḳhsh hi de koi shayad gesuon ki narm chhanv
har na.i basti men ThoḌi der Thahra rah-rau
koi manzil aḳhiri manzil nahin hoti ‘fuzail’
zindagi bhi hai misal-e-mauj-e-dariya rah-rau
Leave a Reply