Rajendra Nath Rahbar
machalte gaate hasin valvalon ki basti men
rahe the ham bhi kabhi manchalon ki basti men
ḳhushi ke bhagte lamhe idhar ka ruḳh na karen
ḳhushi ka kaam hi kya dil-jalon ki basti men
jo aa ke baiTha vo daman pe daagh le ke uTha
bacha hai kaun bhala kahilon ki basti men
guzar gaya huun kabhi be-ḳharash kanTon se
chhile hain pair kabhi maḳhmalon ki basti men
Tapak raha hai lahu jin ki astinon se
vo log aan base hain bhalon ki basti men
base hue hain kuchh ahl-e-ḳhirad bhi ai rahbar
na jaane soch ke kya pagalon ki basti men
Leave a Reply