sada hai is ah-o-chashm-e-tar se falak pe bijli zamin pe baran
nikal ke dekho tum apne ghar se falak pe bijli zamin pe baran
vo shola-ru hai savar-e-tausan aur us ka tausan araq-fishan hai
ajab hai ik sair dopahar se falak pe bijli zamin pe baran
hanse hai koThe pe mera yusuf main zer-e-divar ro raha huun
azizo dekho miri nazar se falak pe bijli zamin pe baran
patang kyunkar na hove hairan ki sham.a shab ko dikha rahi hai
ba-chashm-e-giryan o taj-e-zar se falak pe bijli zamin pe baran
naha ke afshan chuno jabin par nichoḌo balon ko ba.ad is ke
dikhao ashiq ko is hunar se falak pe bijli zamin pe baran
kahan hai juun sho.ala shaḳh par gul kidhar hai fasl-e-bahar shabnam
tire hai e.ajaz-e-Turfa-tar se falak pe bijli zamin pe baran
karo na dariya pe mai-kashi tum udhar ko aao to main dikha.un
sarishk-e-har-nala-o-jigar se falak pe bijli zamin pe baran
kidhar ko ja.un nikal ke ya-rab ki garm-o-sard-e-zamana mujh ko
dikha.e hai shaam tak sahar se falak pe bijli zamin pe baran
vo tegh khinche hue hai sar par main sar jhuka.e huun ashk-e-rezan
dikha.un ai dil tujhe kidhar se falak pe bijli zamin pe baran
ghazab se chin-bar-jabin dikha.e badan se Tapke bhi hai pasina
ayaan hai yaaro na.e hunar se falak pe bijli zamin pe baran
‘nasir’ likkhi hai kya ghazal ye ki dil taḌapta hai sun ke jis ko
bandhe hai yuun kab kisi bashar se falak pe bijli zamin pe baran
Leave a Reply