kitni sadiyan na-rasi ki intiha men kho ga.iin
be-jahat naslon ki avazen ḳhala men kho ga.iin
rang-o-bu ka shauq ashob-e-hava men le gaya
titliyan ghar se nikal kar ibtila men kho ga.iin
kaun pas-e-manzar men ujḌe paikaron ko dekhta
shahar ki nazren libas-e-ḳhushnuma men kho ga.iin
muntazir chaukhaT pe ta.abiron ke shahzade rahe
ḳhvab ki shahzadiyan qasr-e-dua men kho ga.iin
saanp ne un ke nasheman men basera kar liya
peḌ se chiḌiyon ki mahkaren faza men kho ga.iin
koi kya bab-e-aman afat-zadon par kholta
dastaken gulzar tufan ki sada men kho ga.iin
Leave a Reply