hisar-e-hosh men ḳhvabon ke dar rakkhe ga.e hain
koi rasta nahin hai aur safar rakkhe ga.e hain
guhar aata hai aghosh-e-sadaf men buund ban kar
zamin-o-asman men nama-bar rakkhe ga.e hain
basanti dhuup angan men simaT kar so rahi hai
hava ke dosh par peḌon ke sar rakkhe ga.e hain
azal se bhagta huun apne hi saa.e ke pichhe
ta.aqub men mire sham-o-sahar rakkhe ga.e hain
ye kaisa khel hai dushvar jiine ke jatan hain
magar marne ke gur asan-tar rakkhe ga.e hain
ada honge hamari be-baha la-hasili men
vo saare qarz jo is jaan par rakkhe ga.e hain
chaḌha hai din nikal aa.e hain bazaron men saa.e
magar jo jism the saare vo ghar rakkhe ga.e hain
chuna hai reza reza ham ne apni ḳhvahishon ko
ye TuuTe aa.ine the joḌ kar rakkhe ga.e hain
likhega kaun yarab lazzat-e-be-iḳhtiyar apni
saron par katbin-e-ḳhair-o-shar rakkhe ga.e hain
hai ta.aviz suḳhan ka mo.ajiza ‘sarmad’ ki ham par
tilism-e-jah-o-mansab be-asar rakkhe ga.e hain
Leave a Reply