Aakhiri Sach

chehre tamam dhundle nazar aa rahe hain kyuun

kyuun ḳhvab ratjagon ki haveli men dab gae

hai kal ki baat ungli pakad kar kisi ki main

mele main ghumta tha khilaunon ke vaste

jitne varaq likhe the miri zindagi ne sab

andhi ke ek jhonke men bikhre hue hain sab

main chahta huun phir se sametun ye zindagi

bachche tamam paas khade hain bujhe bujhe

shoḳhi na jaane kya hui rangat kahan gai

jaise kitab chhod ke jaate hue varaq

jaise ki bhulne lage bachcha koi sabaq

jaise jabin ko chhune lage maut ka araq

jaise charagh niind ki aghosh ki taraf

badhne lage andhere ki zulfen bikher kar

bhule hue hain hont hansi ka pata talak

darvaza dil ka band hua chahta hai ab

kya sochna ki phuul se bachchon ka saath hai

ab main huun aspatal ka bistar hai raat hai

Leave a Comment