khugar-e-ru-e-khush-jamal hain ham
naz-e-parvarda-e-visal hain ham
ham ko yuun raegan na kar dena
hasil-e-fasl-e-mah-o-sal hain ham
rang hi rang khushbu hi khushbu
gardish-e-saghar-e-khayal hain ham
raunaq-e-karobar-e-hasti hain
ham ne maana shikasta-hal hain ham
mal-o-zar, mal-o-zar ki qimat kya
sahab-e-daulat-e-kamal hain ham
kis ki ranai-e-khayal hai tu
teri ranai-e-jamal hain ham
aise divane phir na aenge
dekh lo ham ko be-misal hain ham
daulat-e-husn-e-la-zaval hai tu
daulat-e-ishq-e-la-zaval hain ham
Leave a Reply