shab thi be-khvab ik aarzu der tak
shahr-e-dil men phiri ku-ba-ku der tak
chandni se tasavvur ka dar va hua
tum se hoti rahi guftugu der tak
jaag utthe the qurbat ke mausam tamam
phir saji mahfil-e-rang-o-bu der tak
dafatan uth gai hain nigahen miri
aaj baithe raho ru-ba-ru der tak
tum ne kis kaifiyat men mukhatab kiya
kaif deta raha lafz-e-‘tu’ der tak
dil ke saada ufuq par tumhi se rahe
rang-e-qaus-o-quzah char-su der tak
rat-jage men raha khvab ka vo saman
kaifiyat thi vahi hu-ba-hu der tak