sang-e-dar us ka har ik dar pe laga milta hai
dil ko avara-mizaji ka maza milta hai
jo bhi gul hai vo kisi pairhan-e-gul par hai
jo bhi kanTa hai kisi dil men chubha milta hai
shauq vo daam ki jo ruḳhsat-e-parvaz na de
dil vo taa.ir ki use yuun bhi maza milta hai
vo jo baiThe hain bane naseh-e-mushfiq sar par
koi puchhe to bhala aap ko kya milta hai
ham ki mayus nahin hain unhen pa hi lenge
log kahte hain ki DhunDe se ḳhuda milta hai
dam-e-tazvir na ho shauq gulu-gir na ho
mai-kada ‘arsh’ hamen aaj khula milta hai
Leave a Reply