Shoalon Mein Gham-E-Zat Ke Jhulsaya Hua Sa

sho.aloñ meñ ġham-e-zāt ke jhulsāyā huā sā

har paikar-e-ehsās hai murjhāyā huā sā

har shaḳhs hai auhām ke aaseb ke hāthoñ

sahmā huā simTā huā ghabrāyā huā sā

sadiyoñ se maiñ jiine kī sazā kaaT rahā huuñ

sāñsoñ kī salīboñ pe huuñ laTkāyā huā sā

har shaḳhs hai be-mehrī-e-hālāt se har dam

rūThā huā biphrā huā jhallāyā huā sā

kyā pā.egā phir vus.at-e-afkār ki ‘rāhī’

roTī ke jhameloñ meñ hai uljhāyā huā sā

Leave a Comment