Azra Naqvi
unhen mujh se shikayat hai ki main maazi men jiiti huun
mire ashar men aaseb hain guzre zamanon ke
vo kahte hain ki yaden saae ki manind mere saath rahti hain
ye sach hai is se kab inkar hai mujh ko
main aksar jagte din men bhi ankhen muund leti huun
koi surat koi avaz koi zaiqa ya lams jab jaadu jagata hai
to gard-alud mina-taur tasviren achanak bolne lagti hain natak-manch sajta hai
kisi tuute hue sanduq men rakkhe hue
bosida makhtute se koi dastan tamsil ban jaati hai
ji uthte hain sab kirdar maazi ke
sipahi badshah khilat navadir raqs-o-mausiqi
kisi ke paanv men paael dhanak anchal
kisi shamshir ki bijli ghani barsat ki badli
kisi bara-dari men raag dipak ka
kisi sehn-e-gulistan men kadam ke ped par baithi hui chidiyan
achanak jaag jaati hain
kisi gumnam qasbe men koi tuuti hui mehrab khasta-hal-devdhi ki jhalak
maadum kar deti hai hotel chae-khane bas ke adde dher kuude ke
kai sadiyan guzar jaati hain sar se
aur koi gum-gashta shahr-e-raftagan bedar hota hai
isi manzar ka hissa ban ke main tasvir ho jaati huun kho jaati huun maazi men
men aksar abna-e-vaqt par kaghaz ki naav daal deti huun
to paani apna rasta mod deta hai
main jab chahun
saloni sanvli nat-khat madhur yaden utha laun ladakpan ke gharondon se
main jab chahun to kaali kothari men qaid
ranjida pasheman zakhm-khurda-saaton biite dinon ko pyaar se chhu kar
dilasa duun thapak kar loriyan duun
khuub rouun khuub rouun shant ho jaun
ye maazi mera maazi hai
faqat mere tasarruf men hai
meri milkiyyat hai mera virsa hai
na mera haal par bas hai
aur aane vaala kal bhi kis ne dekha hai
Leave a Reply