rakhshan-hashmi

Diye Jala Ke Hawaon Ke Munh Pe Mar Aaya

diye jala ke havaon ke munh pe maar aaya

koi to hai jo andheron ka qarz utaar aaya

khuda se jab bhi kadi dhuup ki shikayat ki

to meri raah men ek ped saya-dar aaya

kahan hui kabhi us se hamari did-o-shunid

hava ke rath pe hamesha hi vo savar aaya

sukun bantti phirti huun main zamane men

na jaane kyuun mire hisse men intishar aaya

hazar baar mira dard muskuraega

hazar baar agar mausam-e-bahar aaya

sabab main DhunD rahi thi miri udasi ka

tira khayal mujhe aaj baar baar aaya

kiya hai us ne hi gharat mira sukun magar

usi ke naam pe ‘rakhshan’ mujhe qarar aaya

More Poems

Leave a Comment