Mushkil to Na Tha Aisa Bhi Aflak Se Rishta

Shahbaz Khwaja

mushkil to na tha aisa bhi aflak se rishta

toḌa hi nahin ham ne magar ḳhaak se rishta

har sub.h ki qismat kahan ruḳhsar ki laali

har shab ka kahan dida-e-namnak se rishta

baḳhshi hai tujhe jis ne ḳhad-o-ḳhal ki daulat

hai mere badan ka bhi isi chaak se rishta

chhoḌa hai kise fikr ke dariya ne salamat

raas aaya kise mauja-e-idrak se rishta

‘shahbaz’ main dharti se huun mansub kuchh aise

jaise ki kisi jism ka poshak se rishta