Shahzad Nayar
aise be-mehr zamane se vafa mangta hai
dil bhi saada hai ḳhalaon men hava mangta hai
us ka ham ishq-paraston se taqabul kaisa
shaiḳh to apni ibadat ka sila mangta hai
ja kisi aur se le nisbat-e-aflak miyan
ham zamin-zad faqiron se ye kya mangta hai
mohtasib daman-e-ta.azir kushada rakhna
shahr ka shahr baghavat ki saza mangta hai
ḳhauf itna hai ki bazaron ke siine sakit
qarya qarya kisi baghi ki sada mangta hai
laakh samjha.un mohabbat ki jhalak paate hi
dil vo tarsa hua saa.il hai ki ja mangta hai
kuchh na mil paa.e to majbur tabi.at insan
masjid-o-dair-o-kalisa se dua mangta hai
meri ankhen tire chehre ki tamazat chahen
mera chehra tire anchal ki hava mangta hai
tujh se jiine ke jo asbab talab karta tha
ab vo ji-jan se marne ki dua mangta hai
Leave a Reply