Udhar Ki Shai Idhar Kar di Gai Hai

Ahmad Hamesh

udhar ki shai idhar kar di gai hai

zamin zer-o-zabar kar di gai hai

ye kaali raat hai do-char pal ki

ye kahne men sahar kar di gai hai

taaruf ko zara phaila diya hai

kahani mukhtasar kar di gai hai

na puchho kaise guzri umr saari

zara men umr bhar kar di gai hai

ibadat men basar karni thi lekin

kharabon men basar kar di gai hai

kai zarrat baghi ho chuke hain

sitaron ko khabar kar di gai hai

vo meri ham-qadam hone na paai

jo meri ham-safar kar di gai hai

hamare jugnuon se dushmani thi

zara pahle sahar kar di gai hai