Zafar Moradabadi
kabhi dua to kabhi bad-dua se laḌte hue
tamam umr guzari hava se laḌte hue
hue na zer kisi intiha se laḌte hue
mahaz haar ga.e ham qaza se laḌte hue
bikhar raha huun faza men ghubar ki surat
ḳhilaf-e-maslahat apni ana se laḌte hue
faza badalte hi jaag uTThi fitrat-e-mai-kash
shikast kha ga.i tauba ghaTa se laḌte hue
qalam ki nok se bahta raha lahu mera
hisar-e-ḳhilqat-e-fikr-e-rasa se laḌte hue
junun navard ko manzar na koi raas aaya
mara to shoḳhi-e-ab-o-hava se laḌte hue
pahunch sake na kisi ḳhush-gavar manzil tak
tumhari yaad ki zanjir-e-pa se laḌte hue
unhin pe band hua irtiqa ka darvaza
fana hue hain jo apni baqa se laḌte hue
‘zafar’ ghire to usi razm-e-gah-e-hasti men
hue shahid saf-e-karbala se laḌte hue
Leave a Reply