Aziz Warsi
sozish-e-gham ke siva kahish-e-furqat ke siva
ishq men kuchh bhi nahin dard ki lazzat ke siva
dil men ab kuchh bhi nahin un ki mohabbat ke siva
sab fasane hain haqiqat men haqiqat ke siva
kaun kah sakta hai ye ahl-e-tariqat ke siva
saare jhagḌe hain jahan men tiri nisbat ke siva
kitne chehron ne mujhe davat-e-jalva baḳhshi
koi surat na mili aap ki surat ke siva
gham-e-uqba gham-e-dauran gham-e-hasti ki qasam
aur bhi gham hain zamane men mohabbat ke siva
bazm-e-janan men are zauq-e-faravan ab tak
kuchh bhi hasil na hua dida-e-hairat ke siva
vo shab-e-hijr vo tarik faza vo vahshat
koi gham-ḳhvar na tha dard ki shiddat ke siva
mohtasib aao chalen aaj to mai-ḳhane men
ek jannat hai vahan aap ki jannat ke siva
jo tahi-dast bhi hai aur tahi-daman bhi
vo kahan ja.ega tere dar-e-daulat ke siva
jis ne qudrat ke har iqdam se Takkar li hai
vo pashiman na hua jabr-e-mashiyyat ke siva
mujh se ye puchh rahe hain mire ahbab ‘aziz’
kya mila shahr-e-suḳhan men tumhen shohrat ke siva
Leave a Reply