kis harf pe tu ne gosha-e-lab ai jan-e-jahan ghammaz kiya
elan-e-junun dil valon ne ab ke ba-hazar-andaz kiya
sau paikan the paivast-e-gulu jab chhedi shauq ki lai ham ne
so tiir tarazu the dil men jab ham ne raqs aghaz kiya
be-hirs-o-hava be-khauf-o-khatar is haath pe sar is kaf pe jigar
yuun ku-e-sanam men vaqt-e-safar nazzara-e-bam-e-naz kiya
jis khaak men mil kar khaak hue vo surma-e-chashm-e-khalq bani
jis khaar pe ham ne khuun chhidka ham-rang-e-gul-e-tannaz kiya
lo vasl ki saaat aa pahunchi phir hukm-e-huzuri par ham ne
ankhon ke dariche band kiye aur siine ka dar baaz kiya
Leave a Reply