Sufi
kya kijiye raqam sanad-e-ehtisham-e-zulf
hai daftar-e-jamal pe tughra-e-lam-e-zulf
khidmat ho ghaza-e-gul-e-rukh ki nasim ko
mauj-e-hava chaman men kare intizam-e-zulf
fasl-e-bahar aai junun-khez dekhiye
saudaiyon ko aane lage phir payam-e-zulf
muuzi jo sar chadha to bana mar-e-astin
sar pe na chahiye tha buton ke maqam-e-zulf
sauda-e-zulf chin-e-jabin ne mita diya
taraj chiniyon ne kiya aa ke sham-e-zulf
kab husn-e-arzi pe latakti hai sub.h-o-sham
islam par hai taan se har-dam salam-e-zulf
chhut ke utha rahe hain asiran-e-dam-e-zulf
aram ab kahan dil-e-vahshi hai ram-e-zulf
balon ko apne tum rukh-e-raushan pe chhod do
phenko miyan-e-chashma-e-khurshid dam-e-zulf
taqrir kyuun na uljhi hui bar zaban rahe
hai dars men risala-e-ilm-e-kalam-e-zulf
divane ham hain gardish-e-lail-o-nahar ke
hai sub.h sub.h ru-e-pari-sham sham-e-zulf
paaya siyah-bakhti-e-ushshaq ne bhi auj
firoza-e-falak pe kiya kunda nam-e-zulf
zulfen hava se kab rukh-e-ariz pe aa gaiin
hai sabza-e-bahar ke munh men lagam-e-zulf
aae siyah-dil hain raqibon ke us pe ‘mehr’
poshish men hai abas haram-e-ehtiram-e-zulf
Leave a Reply