Shauq Mahri
palken uThin nigah mili baat ho ga.i
donon taraf se pursish-e-halat ho ga.i
halki si raushni bhi nahin duur duur tak
furqat ki raat kitni baḌi raat ho ga.i
rah-e-junun men be-kas-o-tanha chala tha main
hamrah dil ke gardish-e-halat ho ga.i
ye husn-e-ittifaq ki tum aa ga.e idhar
ḳhush-qismati ki tum se mulaqat ho ga.i
ye vaqt aa gaya hai miri be-kasi ki ḳhair
har ik se puchhta huun kahan raat ho ga.i
ai chashm-e-intizar ye kya e’tibar hai
vo aa chuke aur un se mulaqat ho ga.i
ai ‘shauq’ us ko hasil-e-umr-e-ravan samajh
vo zindagi jo nazr-e-ḳharabat ho ga.i
Leave a Reply