Khaleel Rampuri
raat khaḌi hai sar pe sunahre diyon ka thaal liye
ai man tu bhi umr bata de naqsh-e-ḳhayal liye
lamhe ye be-rang patange kab aate hain haath
saara saara din phirta hai suraj jaal liye
phul-jhaḌiyan si chhuT rahi hain shaam ke daman men
kaun khaḌa hai narangi sa chehra laal liye
aaj samajh men aaya apni ankhon ka mafhum
har insan hai surat par do zaḳhm-e-malal liye
ujli chandni raat si ankhen ujla dhuup sa mukh
haa.e re vo hirni si laḌki shauq-e-visal liye
ghar valon se toḌ ke naata kis ne paaya mujh ko
kahan phiroge sha.ir sahab dast-e-saval liye
gulzaron men basne vaale bhakkar des bhi dekh
thal ka registan bhi hai gudḌi men la.al liye
aaj talak us aurat se aata hai ḳhauf ‘ḳhalil’
ghar men ik din ghus aa.i thi bikhre baal liye
Leave a Reply