Muzaffar Ahmad Muzaffar
bar-e-ḳhatir hui ye umr-e-gurezan janan
tujh ko samjha tha gham-e-hijr ka darman janan
aa bata.un tujhe ashob-e-tamanna kya hai
kaise kaTti hai ye tar-e-shab-e-hijran janan
main ne har gham ko gham-e-ishq se ta.abir kiya
gham-e-jan ho ya bala se gham-e-dauran janan
koi dekhe miri ankhon se asiri ka fusun
ghar hua jaata hai ik halqa-e-zindan janan
ek bhi tir-e-nazar tera ḳhata jaata nahin
sab hue jaate hain paivast-e-rag-e-jan janan
ḳhud-kushi hai ya ye izhar-e-gham-e-furqat hai
ḳhud se hone laga huun dast-o-gareban janan
umr-bhar ghuncha-e-hasti na shagufta dekha
ham ne jaise bhi basar ki tira ehsan janan
kunj-e-ghurbat men ‘muzaffar’ ne ghanimat samjha
jis qadar bhi vo hua be-sar-o-saman janan
Leave a Reply