kabhi harif kabhi ham-nava hamin Thahre
ki dushmanon ke bhi mushkil-kusha hamin Thahre
kisi ne raah ka patthar hamin ko Thahraya
ye aur baat ki phir a.ina hamin Thahre
jo azmaya gaya shahr ke faqiron ko
to jan-nisar-e-tariq-e-ana hamin Thahre
hamin ḳhuda ke sipahi hamin muhajir bhi
the haq-shanas to phir rahnuma hamin Thahre
dilon pe qaul-o-amal ke vo naqsh chhoḌe hain
ki peshvaon ke bhi peshva hamin Thahre
‘faragh’ ran men kabhi ham ne munh nahin moḌa
maqam-e-ishq se bhi ashna hamin Thahre
Leave a Reply