Hadi Machlishahri
dard sa uTh ke na rah jaa.e kahin dil ke qarib
meri kashti na kahin gharq ho sahil ke qarib
vajd men ruuh hai aur raqs men hai pa-e-talab
dekhiye haal mire shauq ka manzil ke qarib
rah gaya tha jo kabhi pa-e-talab men chubh kar
ab vahi ḳhar-e-tamanna hai rag-e-dil ke qarib
ab vo piiri men kahan ahd-e-javani ki umang
rang maujon ka badal jaata hai sahil ke qarib
jazba-e-shauq bhi kuchh kaam na aaya ‘hadi’
na-tavani ne biThaya mujhe manzil ke qarib
Leave a Reply