Mirza Altaf Husain Alim Lucknowi
ulfat-e-ariz-e-laila men pareshan nikla
qais manind-e-sahar chak-gareban nikla
ban ga.e ḳhuub hadaf us sitam-ijad ke aap
lijiye hazrat-e-dil aaj to arman nikla
na hui taqat-e-nazzara kisi ashiq ko
shola-e-husn hijab-e-ruḳh-e-janan nikla
aa ga.i sadma-e-furqat se ajal ashiq ki
hijr-e-mahbub firaq-e-jasad-o-jan nikla
ruuh ne ḳhana-e-tan chhoḌ diya aḳhir-kar
mezban ham jise samjhe the vo mehman nikla
saf-dil bahr-e-jahan men nahin rakhte daulat
chashma-e-mahr se kab gauhar-e-ghaltan nikla
tu vo hai husn men yakta ki tajassus men tire
asman le ke charagh-e-mah-e-taban nikla
vo pari-ru hua qismat se miri mera muti.a
ḳhat-e-taqdir ḳhat-e-mohr-e-sulaiman nikla
mere marne se hue saikḌon arman shahid
‘alim’ anjam men dil ganj-e-shahidan nikla
Leave a Reply