Tujhe Pa Kar Bhi Jab Koi Kami Mahsus Hoti Hai

tujhe pa kar bhi jab koi kami mahsus hoti hai

to phir ye saans bhi rukti hui mahsus hoti hai

jo kahna hi nahin us ka ishara kyuun diya jaa.e

ki aisi baat to kuchh aur bhi mahsus hoti hai

adim-ul-fursati shiddat se us ka yaad aa jaana

ghanimat hai agar ye tishnagi mahsus hoti hai

palaT kar aa ga.e ho tum to kyuun aa.e nahin lagte

tumhari aankh men kyuun gard si mahsus hoti hai

vagarna bojh hai jis ko liye phirna hai kandhe par

karen mahsus to ye zindagi mahsus hoti hai

shajar vo bhi jise sincha ho apna ḳhuun de de kar

kabhi us ki bhi chhanv ajnabi mahsus hoti hai

ye mere ḳhvab hain jo saaya karte hain mire sar par

mujhe is dopahar men chhanv si mahsus hoti hai

kisi ki guftugu ke darmiyan aksar na jaane kyuun

kahin gahri si koi ḳhamushi mahsus hoti hai

zamin teri tarah main bhi safar men huun ki jaise tu

kabhi Thahri nahin Thahri hui mahsus hoti hai