Anwar Shuoor
teri sohbat men baiTha huun
goya jannat men baiTha huun
divar-e-zindan ke pichhe
jurm-e-mohabbat men baiTha huun
ek avaz pe aa ja.unga
jaisi halat men baiTha huun
aa jaao do baten kar len
qadre fursat men baiTha huun
baiTha huun tasvir ke aage
aur haqiqat men baiTha huun
ek jhalak dekhi thi us ki
ab tak hairat men baiTha huun
dekh ‘shu.ur’ us but ke aage
kaise ibadat men baiTha huun
Leave a Reply