Dil Se Puchho Kya Hua Tha Aur Kyun KHamosh Tha

Pandit Jagmohan Nath Raina Shauq

dil se puchho kya hua tha aur kyuun ḳhamosh tha

aankh mahv-e-did thi itna mujhe bas hosh tha

vo bhi kya tasir thi jis ne hila.e sab ke dil

kya bata.un vo mira hi nala-e-pur-josh tha

mahfil-e-saqi men tha kuchh aur hi maston ka rang

koi saghar DhunDhta tha aur koi behosh tha

kya ajab hai ja.eza le mai-paraston ka koi

yaad rakhna saqiya mujh sa bhi ik mai-nosh tha

kya samajh sakta tha koi tere divane ki chup

jab kisi ne us se kuchh puchha to bas ḳhamosh tha

be-ḳhudi se nashsha-e-jam-e-ḳhudi utra to phir

ek hi saghar mila aisa ki main mad.hosh tha

ik hamin ko saqiya puchha na tu ne daur main

varna mai-ḳhane men tere shor nosha-nosh tha

kis qadar tha ishtiyaq-e-manzil-e-maqsud use

marne vaale ka janaza aaj dosha-dosh tha

zindagi-bhar ke gunahon se ye thi sharam ai ajal

tarik-e-hasti yahan se jab chala ru-posh tha

ghunche kyuun ḳhamosh aa.e gulshan-e-hasti men ‘shauq’

mausam-e-gul se magar ḳhauf-e-ḳhizan ham-dosh tha