manzil hai to ik rasta-e-dushvar men gum hai
rasta hai to pech-o-ḳham-e-dildar men gum hai
jis diin se milta tha ḳhuda ḳhana-e-dil men
mulla ke saja.e hue bazar men gum hai
ajza-e-safar varta-e-hairat men paḌe hain
raftar abhi sahib-e-raftar men gum hai
saa.il hain ki umDe hi chale aate hain paiham
vo shoḳh magar apne hi didar men gum hai
vo husn-e-yagana hai koi shahr-e-tilismat
har shaḳhs jahan raston ke asrar men gum hai
ashḳhas ke jangal men khaḌa soch raha huun
ik naḳhl-e-tamanna unhi ashjar men gum hai
ya husn hai na-vaqif-e-pindar-e-mohabbat
ya ishq hi asani-e-atvar men gum hai
ai kaash samajhta koi pas-manzar-e-paigham
duniya hai ki pairaya-e-iz.har men gum hai
Leave a Reply