Lutf Ki Un Se Iltija Na Karen

lutf ki un se iltija na karen

ham ne aisa kabhi kiya na karen

mil rahega jo un se milna hai

lab ko sharminda-e-dua na karen

sabr mushkil hai aarzu bekar

kya karen ashiqi men kya na karen

maslak-e-ishq men hai fikr haram

dil ko tadbir-ashna na karen

bhuul hi jaaen ham ko ye to na ho

log mere liye dua na karen

marzi-e-yar ke khilaf na ho

kaun kahta hai vo jafa na karen

shauq un ka so mit chuka ‘hasrat’

kya karen ham agar vafa na karen

Leave a Comment