shah-naseer

Na Dikhaiyo Hijr Ka Dard-O-Alam Tujhe Deta Hun Charkh-E-Khuda Ki Qasam

na dikhaiyo hijr ka dard-o-alam tujhe deta huun charkh-e-khuda ki qasam

mire yaar ko mujh se na kiijo juda tujhe sarvar-e-har-dusra ki qasam

vo sanam kai din se hai mujh se khafa nahin aata idhar ko khuda ki qasam

dil-e-mushfiq-e-man use khinch to la tujhe jazba-e-kah-ruba ki qasam

yahi chahe hai ji ki gale se lago zara mere dahan se dahan to malo

nahin ghurfe se aan ke jhank to lo tumhen apni hai sharm-o-haya ki qasam

kabhi shab ko akela jo paun tujhe to gale se phir apne lagaun tujhe

kabhi chhati pe apni sulaun tujhe mujhe ishq ke jaur-o-jafa ki qasam

tire uthte hi pahlu men dard utha tire jaate hi dam ye adam ko chala

mujhe chhod ke aah tu ghar ko na ja tujhe apne hi funduq-e-pa ki qasam

mujhe bahr-e-khuda kahin us se chhuda tire hijr ki shab hai ye kaali bala

nahin jhuut main kahta kuchh is men zara mujhe teri hi zulf-e-dota ki qasam

aji dekho to kaisi uthi hai ghata yahi aish ka din hai uda le maza

karo bada-kashi mire mah-laqa tumhen deta huun abr-o-hava ki qasam

aji jaati hai aaj tu vasl ki shab nahin kyuun hai milaya labon se ye lab

mujhe ab to udane de aish tu ab tujhe apne hai mehr-o-vafa ki qasam

lage teri bala mujhe afat-e-jan kabhu phir bhi ye kah ke khilaega paan

mire sar ki qasam miri jaan ki qasam mire ghamza-o-naz-o-ada ki qasam

maren ghair pe aap main tum pe marun mujhe kya hai gharaz kaho kyuun main jalun

yahi ji main hai tum se na baat karun mujhe apni is ah-e-rasa ki qasam

kise dekhun kaho lagun kis ke gale shab-e-vasl men mujh se jo tu ye kahe

ki ye bada-e-surkh tu pi le tujhe mire hathon ke rang-e-hina ki qasam

kahan jaata hai munh ko chhupae hue tire hijr men jaate hain ham to mare

kabhi mud ke idhar ko bhi dekh to le tujhe hazrat-e-sher-e-khuda ki qasam

suno seri na ho mujhe khaao aji mujhe piito jo mujh ko girao aji

mire ghar se na aaj to jaao aji tumhen meri hi shab ki buka ki qasam

mire bichhde ko mujh se milao koi mire ruthe ko la ke manao koi

are yaaro tum us ko bulao koi tumhen khaliq-e-arz-o-sama ki qasam

More Poems

Leave a Comment