ahmed-nisar

Wo To Mujh Mein Hi Nihan Tha Mujhe Malum Na Tha

vo to mujh men hi nihan tha mujhe maalum na tha

khuun ban kar vo ravan tha mujhe maalum na tha

itne majruh the jazbat hamare jis par

charkh bhi mahv-e-fughan tha mujhe maalum na tha

pyaas shiddat ki thi sahra bhi tadap jaata tha

imtihan sar pe javan tha mujhe maalum na tha

pair to pair yahan ruuh ke chhale nikle

duur itna bhi makan tha mujhe maalum na tha

dil bhi hota hai suna karte the har siine men

dard bhi us men nihan tha mujhe maalum na tha

ishq ke bahr men ghota to lagaya lekin

baad men us ke kahan tha mujhe maalum na tha

fitna-gar lutne vaala sar-e-bazar yahan

itna shirin-zaban tha mujhe maalum na tha

husn-e-ulfat ko samae hue siine men ‘nisar’

dil men ik dard javan tha mujhe maalum na tha

More Poems

Leave a Comment