Mubarak Azimabadi
tamashai to hain tamasha nahin hai
gira hai vo parda ki uthta nahin hai
ye kis ki nazar de gai rog ya-rab
sambhale se ab dil sambhalta nahin hai
tadap jaiyega tadap jaiyega
tadapna hamara tamasha nahin hai
bahut phans nikli bahut khaar nikle
magar dil ka kanta nikalta nahin hai
ye har shakhs ki lan-tarani hai kaisi
ki har aankh to chashm-e-musa nahin hai
salamat miri vahshat-e-dil salamat
kahan meri vahshat ka charcha nahin hai
miri jaan bhi hai inayat tumhari
ye dil bhi tumhara hai mera nahin hai
bulai gai un ki mahfil men duniya
magar ek mera bulava nahin hai
zara aap samjhaiye dil ko naseh
main samjha raha huun samajhta nahin hai
tumhen dekhne ko tarasti hain ankhen
bahut din hue tum ko dekha nahin hai
Leave a Reply